Diosa Macrame - Сила, нежност и креативност во секој јазол

Во свет каде сè повеќе работи се создаваат брзо и сериски, рачната изработка останува простор каде времето тече поинаку, поспоро, посвесно и со повеќе значење. DIOSA Macrame е бренд што ја слави токму таа убавина: убавината на јазолот, текстурата и трпението.

Инспирирана од детските спомени, традицијата и силната женска енергија, приказната на DIOSA Macrame започнува како враќање кон корените, а прераснува во современ креативен бренд со јасна визија. Во продолжение разговараме со Светлана Богоевска, креатор на овој бренд, за нејзината инспирација, процесот на создавање и значењето што го носи секое макраме парче.

Како започна твојата приказна со макраме техниката?

Макрамето го открив уште како дете преку мојата мајка, која во 70-тите и 80-тите години учеше од книги и правеше подароци за целото семејство. Подоцна, по многу години, повторно се вратив на оваа техника и ја претворив во моја страст и професија. Секој јазол што го врзав беше како враќање кон едно драго сеќавање, кое денес прерасна во мојот бренд DIOSA Macrame.

Што те привлече токму кај макраме, јазлите, текстурата, процесот?

Ме фасцинира тоа што со едноставни јазли можеш да создадеш нешто уникатно и трајно само со сопствените раце, без употреба на било какви алатки. Текстурата и ритамот на врзување носат смиреност, а процесот е истовремено креативен и медитативен. Секое парче  започнува со идеја, а завршува со нешто што носи душа и приказна.

 Што значи името DIOSA за тебе и како го поврзуваш со брендот?

 „Diosa“ значи „Божица“ на шпански. Сакав да потенцирам дека во секоја жена постои една божица – силна, моќна, таинствена и прекрасна. Името е мој начин да ја славам женската убавина и енергија преку рачни изработки.

Како изгледа процесот на создавање едно макраме парче, од идеја до финален производ?

Секое парче започнува со инспирација, боја, емоција или желба на клиентот. Потоа следи избор на материјали, внимателно врзување на јазлите и комбинирање на текстури. На крај, финалниот производ е резултат на многу трпение, креативност и љубов.

Колку време е потребно за изработка на едно покомплексно парче?

Зависи од големината и сложеноста. Едно големо ѕидно парче може да бара денови, па дури и недели работа, додека накитот е побрз, но бара исто толку прецизност.

Кои производи се најбарани, накитот или декорациите?

 И двата сегмента имаат своја публика. Накитот е популарен кај љубителите на уникатни модни додатоци, додека декорациите се барани за ентериер, особено кај оние што го негуваат бохо стилот. Често клиентите сакаат комбинација, нешто за себе и нешто за нивниот дом.

Што ги прави твоите макраме изработки уникатни?

Секое парче е индивидуално и носи личен печат. Работам по нарачка, внимателно избирајќи бои и материјали според желбите на клиентите. Тоа создава уникатност и неповторливост, а секоја изработка е како мало уметничко дело со сопствена душа.

Од каде најчесто доаѓа инспирацијата, природа, бохо стил, емоции, музика?

Инспирацијата ја наоѓам во природата, во бохо стилот, но и во емоциите и музиката. Секое чувство или момент може да се претвори во јазол и текстура. Понекогаш една песна или боја на зајдисонце е доволна да ми даде идеја за цела колекција.

Каква атмосфера сакаш да создадат твоите изработки во нечиј дом или стил?

Сакам да внесат топлина, хармонија и чувство на уникатност. Да бидат дел од просторот или стилот што носи радост и мир. Моја цел е секој што ќе ги погледне да почувствува дека делото е создадено со љубов.

.

Што научи досега од водењето креативен бизнис?

Научив дека креативноста мора да оди рака под рака со трпение и истрајност. Бизнисот бара организација, но најважно е да останеш верен на својата визија. Секој предизвик е нова лекција која ме прави посилна и поупорна.

Како се справуваш со моменти кога креативноста мирува?

Тогаш се враќам на инспирацијата, прошетка во природа, музика, танц или дружење. Понекогаш паузата е неопходна за да се врати свежината. Верувам дека свртувањето кон себе е дел од процесот и дека токму во тие моменти се раѓаат нови идеи.

Каков е твојот прв впечаток од тоа да бидеш дел од Vividoshop?

Голема радост е да се биде дел од платформа која ги поддржува локалните креатори. Тоа е можност да се сподели креативноста со поширока публика. Се чувствувам како дел од заедница која ја цени рачната изработка.

Што ти значи тоа што твоите рачни изработки се достапни на платформа што ги поддржува локалните креатори?

Тоа е признание и поттик. Ми значи што моите дела можат да стигнат до луѓе кои ја ценат рачната изработка и ја поддржуваат локалната креативност. Секој купувач е дел од приказната што ја градиме заедно.

Кои се твоите планови за DIOSA Macrame во иднина? 

Сакам да продолжам да создавам уникатни парчиња, да развивам нови колекции инспирирани од културното наследство и да организирам повеќе работилници за младите. Моја визија е DIOSA Macrame да стане симбол на современа уметност со корени во традицијата.

Која порака би им ја упатила на сите што сакаат да започнат со рачна изработка?

Да бидат трпеливи и да веруваат во својата креативност. Секој јазол е чекор напред, а секое дело носи радост и личен печат. Најважно е да не се плашат да експериментираат, да ја следат својата интуиција и да останат доследни на себе

Ако твоите макраме изработки беа чувство, кое би било?

Би било чувство на топлина, како прегратка што носи мир и сигурност. Секое парче макраме е создадено да остави трага во срцето на оној што го поседува. Тоа чувство е комбинација од мир, смиреност и задоволство, како момент кога си дома, опкружен со нешто што те прави да се чувствуваш целосно, среќно и задоволно. Секој јазол е како тивка порака на љубов и хармонија, која нежно те потсетува дека убавината е во малите детали.

 

DIOSA Macrame не е само бренд за накит и декорации, тоа е приказна за наследство, истрајност и љубов кон рачната изработка. Секој јазол носи емоција, секое парче има личен печат, а зад секоја креација стои визија за убавина што трае.

Во време кога автентичноста сè повеќе се цени, DIOSA Macrame потсетува дека вистинската вредност е во рацете што создаваат и во приказните што ги вплетуваат во секој детаљ. Сите нивни производи можете да ги најдете во нивната онлајн продавница на Vividoshop: Diosa Macrame